AWM HRANNA
C. Lalfakzuala (Mafaka) - The Healing Touch Ministry
Awm hranna awmzia chu, khawvel thil leh nun atanga, a hnen lama awm tura Pathianin a Fapa Lal Isua chhandamna hmana a 'kohchhuah' 'Awm hran tir' te nun sawina a ni. Pathian hian khawvel mite leh an thiltihte laka min awmhrantir hian chhan leh vang a nei thin a, hmanrua pawh a hmang bawk thin ani.
THUTHLUNG HLUI MITE
Abrahama kha Pathianin Haran khua atanga a koh chhuah khan ti hian a sawi a, "I khaw lam ata leh I laichinteho zing ata leh I pa in ata chhuak la, ram ka la entir tur che lamah kal rawh", (Genesis 12:1-2) Pathianin a koh chhuah chhan chu, ram ka la entir tur che lamah tih vang a ni a. Lota leh a chhungte kha Sodom khaw kang tur lak atangin an kutah a chelh a, a hruai chhuak a (Genesis 19:16).
Israel fate kha Pathianin "Nangni chauh hi khawvela chhungkua zawng zawng a ka hriat in ni a. (Amosa 3:2) a tih avangin , Josefa leh a chhungte chu Gosen ramah Aigupta mi te nena in awmpawlh lo turin ram a pe bawka (Genesis 47:6). Malsawmna an dawn theih nan " an zing ata lo chhuak ula a hrangin awm rawh u", (IIKor. 6:17) tiin. Jerusalem sualna laka inthiarfihlima, a lawmzawnga nung turin a ko bawk a. Tichuan Pathianin Israel afte chu ei leh in tur chenin a ti hrang hial a (Lev. 11:1-47). Thlarau lam nun atan pawh Dan zawm tur a pe a (Exo. 20:1-17).
THUTHLUNG THAR MITE
IPetera 2:9-ah chuan ti hian kan hmu a, "Nimahsela thim ata chhuaka a eng maktak a lut tura ko tu che u thatna chu in entir theih nan nangni zawng chi thlan Lal Puithiam ho, hnam thianghlim, Pathian mi te ngei in ni si a". Hei hian thuthlung thar fate chu Pathian ta leh a khua leh tui ni turin in fapa Isua Krista hmangin min ko tih kan hmu ani. "In thi tawh a in nunna chu Pathianah chuan Krista hnenah thuhrukin a awm si a", (Kolossa 3:3). Thuthlungthar fate chu, "Kross chuan khawvel nen min ti hrang ta" tiin Awm hranna chu a lo thleng ta a ni.
ENG VANGA AWMHRAN TUR NGE?
1. Van mi anna nun avangin: "Tin, leia siam mi anna kha kan put angin, vana mi anna chu kan pu bawk dawn a ni. (IKor. 15:49). Lal Isua chhandamna avang chuan 'mithianghlim te nen chuan tualkhat leh Pathian chhungte kan ni ta zawk a (Ephesi 2:19). A nihna diktak chu 'he lei ram mi kan ni lo, khualzin kal lai mek kan ni' tih hla ang hi a ni. Chuvangin, Lal Isuan tawngtai dan tur min zirtir pawhin "I duhzawng vanah an tih ang lei a min ti rawh se" (Matthaia 6:10) ti turin 'awmhranna nun' chu a rawn sawi hial ani kan awm dan leh rilru put hmang te chuan vanlam thil ngaihtuah ula 'I ro awmna apiangah I rilru a awm thin' tih a ni si a.
Khawvel thilin min chiahpiah thin mahsela, chung lama rilru nghah tlatna nun 'awmhranna' avang chuan Vana mi anna nun chu vawnhim a tul thin (Chutichuan Krista hnenah kaihthawhin in awm ve tawh chuan chung lam, Pathian ding lama thu Krista awmnaa thil awmte chu zawng rawh u." (kolossa 3:1-2) Van mi anna nun hrang kan neih lai hian thlarau do thintu tisa chaknate chu bansan a lo tul a. Chu 'bansanna' nun chu 'awmhranna nun' ze dik tak chu alo ni. (Duhtakte u, mikhual leh khualzin in nih avangin, thlarau do thintu tisa chaknate bansan turin ka ngen a che u." (IIPetera 2:11)
2. Nun leh thiltih ah: Piangthar mize hluia nung reng leh danglamna chuang awm lo chu awmhranna ah a awm lo a ni. (... mihring hlui chu a thiltihte chawpin in hlip tawh a, mihring thar chuan in inthuam tawh si a, mihring thar chu hriat famkimna nei turin, a siam tharin, a siamtu anpui anga siam thar in a awm mek a ni. (Kolossa 3:9-10) Pathian pawh khawvel mite hnenah a cheng lova, kan danglamna chu a hranga kan hnena a awm thin hi a ni a (Exodus 33:16). Chutiang bawk chuan aman min serhhran, awmhrantir tawh avangin kan chetzia, nun leh thiltih pawh a hranga langchhuak tur alo ni thin (IIKor. 6:14, Ephesi 5:3-5)
A tlangpuiin hengte hi tih loh tur ani:
1. Inngaih leh bawlhhlawh zawng zawng.
2. Duhawmna pawh lam loh tur.
3. Zahmawhte, thu lawilo sawi te, fiamthu te pawh.
4. Ringlo mite nen rual lo taka nghawngkawl bah dun loh tur.
3. Nun Krista: Galatia 3:20-ah chuan 'awmhranna' nun chu ti hian a saw a, "...nimahsela ka nung a ni, keimah erawhchu ka ni tawh lo; Krista chu keimahah a nung zawk a ni..." Tunhma a khawvel tana nung kha 'Krista tan' alo nungin alo 'awm hrang' ta a. Khawvel a awm lai chuan khawvel atangin khawvel tan a nung a. Krista ah erawh chuan Krista avanga nungin Krista tan a nung a ni. Ringtu tam tak an nunna innghahna khawvel thil la ni tlat te leh an nunna pawh khawvel nen la inkaihhnawih tlat a awm fo thin. Chuvangin, khawvel a tan khenbeh a awm a, amah pawh khawvel tan khenbeha awm (Kross nun) (Galatia 6:14) nun neih a tul ani. Kan thiltih leh duhzawng chuan khawvel pawhin chutiang ni a min ngaih theih loh tura nun a pawimawh thin.
Khenbeh nun chuan, "awmhranna" min pe a, kan taksa duhzawng leh thiltih pawh alo danglam ngei ngei thin. (In taksa pengte pawh fel lohna hriamhrei atan sualna hnenah pe phal hek suh u, amaherawhchu, mitthi zing ata nung leh angin Pathian hnenah inpe ula, in taksa pengte pawh chu felna hriamhrei atan Pathian hnenah pe phal zawk rawh u. (Rom 6:13)
4. Awmhran hlenna: Khawvela an awm laia khawvel thil / tisa thil laka awmhranna chuan thih hnu ah Pathian rorelna hmaah 'awmhranna' ah a hruai dawn a. He khawvelah sual leh a thiltihtheihna atanga awm hrang lo tute chu 'awmhranna' tawng mahse chatuan 'Hremhmun a awm hranna' a ni thung dawn a ni. "Khawvel tawp hunah chuan chutiang bawkin a awm ang; Vantirhkohte chu an lo chhuak anga, mi fel zing ata misualte chu an hlir ang." (Matthaia 13:49). Beram leh kel angin a thliar hrang hlawk bawk ang (Matthaia 25:32-33). hemi hunah hian ringtu Pathianin a kohchhuah "An zing ata lo chhuak ula, a hrangin awm rawh u", a tih zawm tute chu Pathian hnenah an 'awmhrang' hlen tawh dawn a ni.