KOHHRAN DINHMUN
"Pathian chhungte chu Pthian nung kohhranho, Thutak ban leh innghahna chu an ni" (ITimothea 3:15)
1. Pathian nung Kohhranho: Sam 115:4-7-ah chuan Pathian nung lo, milem pathian an awm thu kan hmu a, kanaan ho pathian Baal te, Asterothi te, Amon ho pathian Khemos, etc. an awm a, chungho chu Israel fate khan an be thin a ni.
Kan sawi tawh ang khan Lal Isua chu Kohhranho 'Lu' niin a 'taksa' chu Kohhranho an ni a, a dintu leh neitu Lal Isua chu thihna hneha tho leh a nih avangin Kohhranho zingah chuan nungin a inlar thin. Van kohhran leh lei kohhran chu a dintu nunna avangin a inzawm tlat a, chuvangin Kohhranho hi miten thendarh tum mahsela, a keh chhe thei tak tak lo a ni. "Lei chunga mihring zawng zawng te hi kei leh i mite nen kan inthliar hranna tur chuan nang kan hnena i kal thin hi a ni lovem ni?" (Exodus 33:16)
2. Thutak ban leh innghahna: "Vanram chabite ka pe ang chia, lei chungah engpawh i phuar apiang Vanah phuar a ni anga, lei chungah engpawh i phelh apiang Vanah phelh a ni ang" (Matt. 16:19) tia Lal Isuan a sawi angin 'thutak ban leh innhgahna' a phuntu Lal Isua vangin a ni a, a mawhphurhna a sangin a nihna a ropui em em a ni. A chhungah Lalpa a awm avangin "Hla satuten, a lamate nen chuan, 'Ka tuihna zawng zawng chu nangmahah a ni a awm ni" (Sam 87:7)" an tihna hmun a lo ni a. Kohhran mimal tinte thlarau lam thanlenna leh Chanchin Tha hrilhna ah mawhphurhna lian tak a ko-ah a innghat a ni. Thutak lo tamtak a awm laiin 'Thutak ban' (Lal Isua chanchin tha) leh innghahna (Chanchin Tha hretute) ani hi a hlu em em a ni.
Thuthlung hmasa (Thuthlung Hlui) ah khan rawngbawl dante leh hmun thianghlim (Biak Buk) an nei thin a(Hebrai 9:12), Lal Isua hun lai khan Synagog-ah an inkhawm bawk thin. Thuthlung thara Kohhran a lo din khan 'Biakin' te neiin Kohhranho pawh hmun hrang hrangah an lo awm darh ta a ni. kohhran-a nun ho na laimu chu 'Biakin inkhawm' a ni a, chutah chuan Penticos ni a Thlarau Thianghlim changte leh ringtharte kha an inhmu khawm thin (TK 2:42). Biakin chu thlarau lama infuih tawnna leh rawngbawl tura penchhuahna hmun a nih avangin inkhawm pawh bansan hauh lo turin Hebrai ziaktu chuan Kohhranho chu a fuih hial a ni. (Hebrai 10:25)
Kohhranho zingah chuan rawngbawlna chi hrang hrang Pathianin a pe a. Tirhkohte, Thuhriltute, Zirtirtute an ni a. Thlarau thilpek hrang hrangte leh thilmak tih te in a thuam bawk a. (Ikor.12:27-31); nimahsela thlarau erawh chu hmunkhat niin thlarau hmunkhat vek chuan mi tin hnenah a duh ang zela sem theuhvin a thawk thin (IKor. 12:4-6, 11). Taksa pumkhata peng hrang hrang awm ang hian 'Krista taksa' nihna chu Kohhranho nihphung a ni (Ikor. 12:12-26)
KAN MAWHPHURHNA
"Lalpa Zion khawpuiah chuan khawngaiha min tel tir chuan, khawvelin min hmusit mahse, I hming chauh ka chhuang ang e" tia Hla siamtu testimony ropui tak ang hian keini pawh kohhran zingah thahnemngai taka kan awm a pawimawh thin. Inkhawm, thawhlawm thawh leh hna hrang hrang thawhte chu inchhuan nan leh chapo nan kan hmang tur a ni lova. Chutiang kan tih thin chu kan tihtur reng ti kan ni chauh zawk a ni (Luka 17:10 - "Chutiang bawkin nangni pawhin in hnena thupek zawng zawng anga in tih hnuin 'Bawih thahnem lo kan ni e; kan tih tur reng a ni kan tih hi', ti rawh u").
Kohhran hi kan tello in a famkim lova, a chhiat a thatah mitinin mawh kan phurh avangin Kohhran a lo chauh deuh pawhin 'A chhe lai siam thatu' (Isaia 58:12) nih tum theuh chu kan mawhphurhna a ni.
