TAWNGTAINA
C. Lalfakzuala (Mafaka) - The Healing Touch Ministry
Tawngtaina awmzia chu "Pathian nena inbiak" tiin a sawifiah theih awm e. Lawmna kan chunga a lo thlenin kan tawngtaia, manganna leh harsatna kan tawhin kan tawngtai bawk thin. Amaherawhchu, kan tawngtai tam dan ngaihtuah erawh chuan a chhanna kan hmu tlem hle lawi si a, chhut tur tam tak a awm a ni.
Tawngtaina avanga Pathian tanpuina hi a dawngtu nunah chuan a hlu em em a. Chuvangin Sam 116:1-2-ah chuan, "Lalpa chu ka hmangaih a ni, ka aw leh khawngaih ka dilnate chu a ngaihthlak avangin. Ka lama a beng a rawn dawh avangin ka damchhung zawngin amah chu ka ko vang". a ti hial a ni.
TAWNGTAINA CHHAN A NIH LOH THEIH NA TE:
1. Thinlunga sualna ngaihsak: Sam 66:18-ah Ka thinlunga sualna ka ngaihsak chuan Lalpan mi ngaithla lovang", a ti a. 'Sualna ngaihsak' tih awmzia chu zawlnei Isaian "He mite hian mi rawn hnaih a, an ka leh hmuiin mi chawimawi thin tak a, nimahsela an thinlung chu ka hlatah an sawn a..." (Isaia 29:13) a tih ang te leh "Lalpa, an mangan laiin an zawng ruai thin chia, i hremna chu an chunga a tlak laiin an tawngtai mawlh mawlh a" (Isaia 26:16) a tih ang te an ni a. Mahni mamawh hun chauhva Amah hria a, hun danga hre leh si lo tute nun hi a ni.
2. Dil dik loh vang: Jakoba 4:3-ah chuan, "in dil a, in dil dik loh avangin in hmu lo, in nawmsak nan hman in tum si a", a ti a. Kan hmuh lohna chhan chu 'kan nawmsak nan hman' tumna vang ani. Mi thenkhat chuan malsawmna kan dilin, Pathian ropuina lam tur aiin kan nawmsak beiseina vangin kan dila. Mirethei pawhin namsawk duhna avangte leh mihausa pawhin nawmsak belhchhah nan te kan dil thin a. Hrehawmna leh manganna laka chhanchhuah dilna pawh ama tana nun let ve na aiin kan tisa duhzawng tihtheih nante a ni fo va. Rawngbawltute pawhin Pathian ropuina aia ama ropuina tur rilru pu chunga a tawngtai chuan chhanna a thleng lo thin. Chuvangin, engpawh a duhzawng anga kan dil chuan anin min ngaihthlaksak thin (Ijohana 5:41). Kan dila kha kan mamawh tak a ni em? Ama ropuina tur a ni em? tih ngaihtuah hmasak a pawimawh hle awm e.
TAWNGTAINA HLAWHTLIN DAN:
1. Paingtharlo tawngtaina: Mi tamtak piangtharlo pawhin Pathian hnena an tawngtai thin thu leh Pathianin a chhan thin thu an sawi fo thin. Engvanginnge Pathianin an tawngtaina a chhan thin? Sam 34:18-ah chuan, Lalpa chuan thinlunga lungchhiate chu a hnaih thin a, rilrua inchhir apiangte chu a chhandam thin," a ti a. An sualna avanga inchhirte tawngtaina ah pawh khan a lang thei a ni (Luka 18:13). Chuvangin, misual tawngtainaah chuan rilrua inchhir ngawih ngawih, Pathian thua khur thin nun avangin Lalpan an lam a en thin vang a ni (Isaia 66:26). Piantirh ata mitdel pawh khan "Pathianin misual thu a ngaithla thin lo tih kan hria; nimahsela tupawhin Pathian a ngaihsaka, a duhzawng a tih chuan Pathianin ani chu a ngaithla thin (Johana 9:31) a ti a. Pathian duhzawng leh ngaihsakna nun, piangtharlo te nuna lo lang tur chu 'thinlung lungchhia leh inchhir ngawih ngawih' hi a ni (Sam 52:176).
2. Amah (Lal ISUA) a awm reng: Johana 15:7-ah chuan, Nangni keimaha in awm reng a, ka thu nangmahnia a awm reng bawk chuan in duh apiang dil rawh u, in tan tihin a awm zel ang", tiin min hrilh a. 'Amaha awm leh a thu keimahnia awmna' atangin tawngtai a hlawhtling thin. Amaha awm nun chu 'Pathian duhzawng anga nun, thiltih' tiin a fun kim awm e. Bible-ah hian Lal Isua-a awmte tawngtaina in thil a tihtheihzia kan hmu thin a. Eliza tawngtaina avangin kum 3 leh thla 6 ruah a sur lova, a tawngtai leh a, vanin ruah a surtir leh a (Jakoba 5:17-18). Abrahaman Sodom khaw tan a dilna chuan Pathian a au ei hial ani (Genesis 18:26-33). Chuvangin, Amah tihtute leh Amaha awmte hnenah in rawn tawngtai anga, ka ngaithla ang che u (Jeremia 29:12) tiin min thlamuan thin. Amaha awm lo atanga tawngtai thin dinhmun nen chuan a inthlau hle mai. Amah tihtute hnenah chuan 'mi au la ka chhang ang che, thil ropui leh inthup i hriat ngai loh chu ka entir ang che' (Jeremia 33:3) a ti nghe nghe a, a ropui hle a ni.
3. Dil ngun (Chain of Prayer): Kan tawngtai hian pathian hian a chang chuan min chhang mai lo thin a, kan beidawnga, kan theihnghilh fo thin. Lal Isuan tawngtai chungchang a zirtir a (Luka 11:5-8), hei hian kan thil dilte bawhzui a tulzia min zirtir awm e.
Pathian nghaktute reng reng an mualpho ngai lova, "Ani, nangmah nghaktu reng reng chu tumah mualphovin an awm lovang (Sam 25:3). "I thil siam zawng zawng mite chuan an nghak thin che a ni. Nangin a hun takah an chaw i pe thin" (sam 145:15). Chuvangin a hun takan Pathianin min chhang thin a, tawngtai chhunzawm (Chain of Prayer) a tul fo thin a ni. Jabeza pawhin, "Aw, mal min sawm ngei la..... (IChro. 4:10) tiin ngenngawl takin Pathian a auva, Pathian a chhang a ni.
Copyright © 2008 Tanpuitu.Org. All Rights Reserved.